Flippaður fimmtudagur

Í dag er föstudagur þá og því aðeins að í gær var fimmtudagur. Fimmtudagar eru flippaðir, oft reynir maður að gera þá flippaða en suma daga, eins og í gær, gerir fimmtudagurinn þetta upp á eigin spýtur.

Ég bara datt í það að taka þátt í söngkeppni MR í gær með lagið All By Myself eftir Eric Carmen. Maðurinn með kvenmannsnafnið hefði verið stoltur af stráknum því að ég tók mig vel út á sviðinu og hef fengið að meðaltali klapp á bakið frá fimm manns á klukkutíma síðan þá.

En þegar keppnin var búin (með slettu af dómaraskandal) um klukkan átta vissum við Sveinn ekkert hvað við áttum af okkur að gera. Hvað gera bændur þá (þess má geta að bóndi er bústólpi)? Þar lágu Danir í því. Jæja, auðvitað gengum við. Í hvaða átt? Skiptir engu. Á Vesturgötunni hittum við fjórar litlar stelpur sem voru á að giska 8-9 ára. Aðspurðar sögðust þær allar vera á tólfta ári og í barnakór Dómkirkjunnar. Við, miklir áhugamenn um börn og barnalega hluti, töluðum lengi við þær. Þær sögðust aldrei horfa á barnatímann og þegar þær sögðu oj við Otrabörnunum var ljóst hvert stefndi. Ég sagði við þær að aldrei yrði neitt úr þeim og þær örkuðu á brott hrópandi; ,,Áfengi, bjór, DJAMM!" aftur og aftur. Við gengum hlæjandi burt. Við ákváðum þá að fara í átt að joðellhúsinu og beygðum upp Framnesveginn. Þegar við áttum svona fjóra metra eftir af Framnesveginum sagði Sv1: ,,Hvenær komum við eiginlega að þessu...?" en hætti skyndilega þegar svarið blasti við honum. Við fórum á Hróa Hött og fengum fjörutíu prósenta afslátt af pizzu með því skilyrði að við ætum hana fyrir utan. Það var kalt, en við unnum. Vel á minnst, Aron Þór Leifsson var á Hróa Hetti. Jæja, það var mikil rónastemmning á bekknum fyrir utan Hróa hött en þá kom afmælisbarnið og sótti okkur. Henti okkur út í Þingholtunum og við gengum um með bjór í poka í miðbænum. Fórum í röð á Sólon (20:30 á fimmtudagskvöldi), gengum síðan á Arnarhól, sungum margvísleg lög (nú erum við í góðum málum...). Eftir að hafa gengið yfir tjörnina hoppuðum við upp í bíl og þúst partí ball heim og þetta venjulega.

En það flippaðasta gerðist heima hjá Eddu. Ég var að setja tannkrem upp á hillu en hún var að þvælast fyrir með höndina. Þess vegna misst ég tannkremstúpuna og hún lenti, eftir 10 cm hátt fall á framhandleggi Eddu. Varð það til þess að hann varð allur rauður og stór kúla myndaðist. Ég var meira en hræddur um að þetta væri opið beinbrot um stund en síðan útilokuðum við það. Í morgun leit þetta þó mun betur út.

Takk fyrir að lesa þetta allt.